集合才子、怪傑、狂儒等稱呼於一身，依位清末民初嘅學界「另類人物」辜鴻銘，一生可以話係相當奇特，佢努力向外國傳播中國傳統文化，據講仲係第一個用英文同德文翻譯《論語》、《中庸》嘅中國人。

辜鴻銘生於現今嘅馬來西亞檳城，細個先後去過德國、英國等地讀書，精通英文、法文、德文、拉丁文、希臘文等多種語言，據講佢仲擁有十幾個博士頭銜。辜鴻銘1885年返咗中國，鑽研中國文化，之後做過兩廣總督張之洞嘅幕僚。雖然响外國讀過書，但係佢贊成男人可以三妻四妾，又中意女性紥腳，而辛亥革命之後，佢依然留返條辮，去咗北大教書嘅佢，仲會著住中式大掛上講台。

唔少資料講過，辜鴻銘有次响外國搭交通工具睇風景，幾個外國年輕人見到佢捲起褲腳咁款，就不斷評論佢，啲用字語氣當然唔好得去邊。辜鴻銘好沉默咁拎起張英文報紙嚟睇，啲年輕人一望，笑佢連張報紙上下調轉咗都唔知，簡單而言就係笑佢無文化。點知辜鴻銘好淡定，一開口就係標準英文，「太簡單喇，唔調轉嚟睇仲有咩意思。」

辜鴻銘雖然恃才傲物、行事怪誕，但佢學貫中西，得到唔少人嘅尊重同欽佩。面對眾人侃侃而談，並非一件易事，不過辜鴻銘可能係個例外。佢當年於北京嘅六國飯店內，向外國人演講《The Spirit  of Chinese people》（《春秋大義》）。有咩咁勁？佢賣飛，仲賣得貴過名伶梅蘭芳。據講當時梅蘭芳做演戲，門票最多收$1.2，而辜鴻銘嘅talk show，收兩蚊。當時外國人之間流傳一句話：「去到中國，可以唔睇故宮，但唔可以唔去睇辜鴻銘。」

原圖嚟自網絡。